<< Ga terug

’t Is maar wat in disse stad

’t Is maar wat in disse stad

Zakt in de geute, ’t liekt d’r eindeli’jk op det d’r een ende kump an de skand vlekke an de Boom aamt stroate. De verwaarloosde villa woar de gemeente vijf en twintig joar veur verantwoordeli’jk is e west en noagenog niks an ‘doan ef, wordt e sloopt en in ‘istorische stijl terug e bouwd. Ik oale mien twiefels want zelfs een mosie in twee duzend zeumtiene van de SGP e steunt deur een roadsmeerder’eid det de zaak veur ’t ende van twee duzend achtiene of e rond mos worrn is niet noa e koomm. Ik ‘eb d’r al ies eerder op e weezn want ik was d’r zelf bi’j toen de veurmalige wet’older Gaitjan Velthoen in februari twee duzend twaalf de belofte deed veur de vakansie kom ik met een plan van anpak, now niet dus, achterof bleek det d’r niet bi’j e zegd ad veur welke vakansie.

Restaurasie was mooier e west, maar goed as det dan niet ‘aalbaar is dan maar goan veur de tweede beste oplossing. Sommigen gruuwn van ‘istorische ‘erbouw maar as ’t goed gebeurt vin ik det d’r niks mis mee is. Alleent ‘oop ik det wet’older Holtland de rugge rechter old as Velthoen destieds, ei’j gef de bouwer twee joar de tied um de klus te kloarn, de geschiedenis ef e leert det ie in ieder geval op ’t vinke touw mut zittn, een man een man een woord een woord, want ’t kan toch niet zo weezn det ’t nog ies weer joarn giet duurn.

Gisteren bin veur ’t tiende joar de drie genomineerdn veur ’t grune lintien bekend e maakt, een intiatief van Gruunlinks, inmiddels een tradisie die niet meer weg te denkn is, en al elmoale bi’j Kampen ‘eurd. ’t Is een klein gebaar maar ’t old ons toch merakels skarp um bewust umme te goan met natuur en miljeu, ik mag liedn det d’r veule e stemt wordt en det ’t lintien bi’j de juuste genomineerde terechte kump.

’t Intiatief van AMDG um een concert te geem an de Wijdeblik verdient noavolging, want vake as d’r iets op pootn wordt e zet is ’t ook snel weer veurbi’j, neem de koop oamd concerties somers op de Plantage, ‘ardstikke leuk maar was zo weer over. En d’r is de laaste joarn toch al zo’n kladde veranderd in ons plaaseli’jke muziek wereltien, de Volharding bestiet niet meer, de Broederband kump niet meer op stroate net zoas ’t Stedeli’jk orkest, jammer maar de tradisionele korpsn vergriezn en speuln alleent nog maar zittend op de stoel, maar dan kump d’r toch nog wel een mooi stukkien muziek uut, de muuite weerd um det wat vaker te loatn ‘eurn, want doar doei veuln een groot plezier mee.

Tot slot wik jullie eem meegeem wat mien kammeroad overkwam, ei’j liep veurige weke zundag morrn an de Iesselkante boom strooms toen d’r een boot aanmeerdn, d’r stapt iemand van boord of en die zeg, meneer mag ik u iets vragen, ja netuurli’jk zeeg ie, wat een prachtig stadfront is dit, is dit nou wat jullie Maastricht aan de IJssel noemen, now zeeg mien kammeroad det is wel wat we veurstoan, vervolgns vroeg de skipper waar kan ik hier een vers broodje kopen , now ‘eh ‘uh nee, nee meneer det kan niet in Maastricht aan de IJssel. En zo ziej maar weer zo is d’r altied wel wat in disse stad.

Appien Floep



Op de hoogte blijven van het laatste nieuws? Like ons ook op Facebook!

Ontworpen door BCO Reclameburo